新地黃植榮（左）與再培訓局梁永祥（右）為婆婆送上福袋。【晴報】媽咪話新年就到，叫黛安趁年廿八執屋。唉，日日都返工，放假真不願郁，與其辛苦自己不如請家務助理。人家有錢賺，我又無煩惱，仲可幫到老人家，三贏！
關老人家咩事？話說僱員再培訓局今年邀得新地贊助，每十個人透過「樂活一站」聘用家務助理大掃除，新地就會出錢請人，免費為一位獨居長者清潔家居三小時，名額388個，是不是很有意義呢？
上星期僱員再培訓局主席梁永祥、行政總監吳家光，仲帶黛安同新地執董兼副董事總經理黃植榮等，到小西灣探年屆百歲的陳婆婆。婆婆平日都有執屋，但年紀大，有 些地方如碌架床、天花電綫槽等都難以打掃。當她聽到遲下有人上來為她清潔，不知幾開心，但又擔心道：「會唔會太辛苦你哋？」真是可愛。

建議時薪100-120元

平日請一個家務助理時薪約75元，但由於大掃除時，僱主多要求阿姨清理平時少抹的地方，如廚櫃角落、窗戶及大型傢俬背後的頑固污漬，難度較高，梁主席建議付100至120元時薪。另記住為家務助理買勞工保險，再培訓局提供一次性勞保，每次20元。
梁主席說外母最愛整年糕派街坊，當他獲悉有整糕服務，都話要請人幫手；吳總監則自爆是家務助理長期僱主，每星期都請人上門煮飯。點解？因為菲傭的餸不及阿姨的好吃囉！

Source : http://www.skypost.hk/newsDetail/headline?headline=你請家務助理 新地贊助長者執屋